BTC inthlanah vote 75% a tla

Assam-a Bodoland Territorial Council (BTC) inthlan Nilainia neih zawh takah 75% vote a tla a, polling station te'n report an thehluh kim hunah vote tla percent hi a pun belh leh ang.

State Election Commissioner HN Bora chuan inthlanna chu tluang taka neih zawh a nih thu sawiin, pawikhawihna leh tharum thawhna thleng a awm loh thu a sawi a, polling station pa­thumah vote thlak ṭhat a ṭul thu a sawi bawk.

Bodoland Territorial Area District (BTAD)-a Inspector General of Police LR Bishnoi pawhin thil duhawm lo thleng report an dawn loh thu a sawi a, police leh security force te chuan inthlan result puan thlengin khauh taka venhimna an kalpui an tum thu a sawi.

BTAD hian Assam-a district pali- Kokrajhar, Chirang, Baksa leh Udalguri district te a huam a, tun ṭum inthlanah hian voters nuai 20.64 chuangin candidate 315 te hmalam hun an relsak dawn a ni.

Kum 2003-a din, BTC-ah hian member 46 awmin, mipuiin member 40 an thlang a, member paruk chu BTC hotute thurawn angin Assam Governor-in a ruat ang.

Vote thlak ṭhat ngaihna hmunah April 10 hian vote thlak ṭhat a ni ang a, April 11-ah vote chhiar­in, result puan a ni ang.