Tripura Health official 17 lakah FIR thehlut

National Rural Health Mission (NRHM) sum chingpen avangin Tripura Health department official 17 lakah First Information Report (FIR) thehluh a ni.

Official zingah hian Unakoti district-a Chief Medical Officer (CMO) Dr Alok Dewan pawh a tel.

NRHM sum chingpen chungchanga departmental inquiry neih tawhah, inquiry report chuan kum 2006 leh 2014 inkarah Tripura hmar lam district-a CMO panga leh Medical Officer In-Charge (MOIC) 10-in cheng vaibelchhe 4.47 an khawih chingpen tiin a tarlang.

Departmental inquiry hi National Health Mission (NHM) Mission Director Dr Sandeep N Mahatme kaihhruaina hnuaiah neih a ni.

"NRHM sum chingpen chhui a nih laiin CMO leh MOIC zawng zawngte chu sum an hman dan tarlanna thehlut tura hriattir an ni a, mahse tun thlengin an thehlut thei lo a, hei vang hian official 17 lakah FIR kan thehlut ta a ni," tiin Dr Mahatme chuan a sawi.

FIR hi Prevention of Corruption Act 1988 leh IPC section 120 (B), 409 leh section 420 tlawhchhanin, Unakoti district-a Kailashahar police station-ah ziahluh a ni.

Congress MLA Birajit Sinha chuan kum 2006 aṭanga NRHM sum cheng vaiebelchhe 26 chingpen chungchangah Unakoti district CMO lakah hian thubuai siam turin sorkar a lo phut tawh a, state sorkar chuan NHM Mission Director hi departmental inquiry nei turin a hriattir a ni.