Nagaland sorkarin 'Gau Mahasabha' buatsaih remti lo

Nagaland sorakar chuan Kohima-a bawng humhalh leh, bawng talh khap thlawpna lantirna tur programme, 'Gau Mahasabha' neih tum chu a remti lo.

Chief minister Neiphiu Rio hoa cabinet meeting neihah, an state-a he programme hman tum chungchang hi ngaihtuahin, phalna pek loh ni se tia thutlukna an siam thu sorkar thupuangtu leh minister, C L John chuan a sawi.

Cabinet chuan Constitution-a Article 371A hnuaiah Naga mite sakhua leh tihdan phung bakah, Naga customary law te humhalh tlat a ni tih sawiin, state chhunga civil society organisation leh political party hrang hrang pawhin he programme buatsaih tum an dodal thute pawh an tarlang bawk.

John chuan, "Cabinet in khawtlanga boruak ṭha lo zawk a chhuah lohna turin programme hman phalna hi a pe duh ta lo a ni," a ti a, hei bakah he programme buaipuitute pawh Nagaland-an an kal loh chu a ṭha zawk nia sorkarin a ngaih thu a sawi.

'Gau Mahasabha' programme neih tum hi rorellai, Nationalist Democratic Progressive Party (NDPP) bakah an thawhpui ,BJP leh Naga Peoples’ Front (NPF) te chuan an dodal a, civil society organisation hrang hrang pawhin an duh loh thu an sawi. An zingah hian Naga Mothers’ Association leh Naga Students’ Federation te pawh an tel.

Civil society hrang hrang chuan bawngsa chu kum tam tak chhung Naga chawhmeh lar tak a ni a, an hnam tihdan phung leh ei leh in chungchangah sorkar emaw, pawl dang emaw pawh Naga mite rilru ti na zawnga che lo turin an ti a ni.

Kohima-a 'Gau Mahasabha' programme hi India ram puma bawng talh khap a nih theihna tura hma lakna, Gau Dhwaj Sthapana Bharat Yatra hnuaia neih tum a ni. He movement hian bawng chu ‘Rashtra Mata’ (Mother of the Nation) status pek a, Indian Constitution-a central list-ah bawng humhalhna tur hi dah an phut a ni.

Yatra hi September 22 aṭangin ram pum huapa neih a, October 26 thleng neih an tum. Hemi chhung hian an hruaitu, Shankaracharya leh Pujya Gopal Mani chuan India ram state leh Union Territory-te tlawh chhuah vek a, state khawpui tinah Gau Dhwaj (Cow Flag) dah vek an tum a ni.