Tripura : Kum 151-a upa damdawiin thuam ṭha dawn

Tripura chief minister Dr Manik Saha chuan Nilaini, September 11,2024 khan Agartala-a state referral hospital, Indira Gandhi Memorial (IGM), kum 151-a upa chu thawm ṭhat a nih tur a puang.

He damdawiin hi British architect-te sak niin, kum 2010 thleng khan damlo enkawl nan an hmang. Damdawiin thar sak a nih hnuah he hmuna bungrua te hi sawn fai vek an ni a, mahse sorkar chuan a building hi ṭhiat lo a rauhsan a nih thu erawh a puang a ni.

CM Dr Saha chuan health official-te IGM hospital thawm ṭha tur hian hma la turin a hrilh a ni. Tripura sorkar hian Ujjayanta Palace, Umakanta Academy leh MBB College te chu a lo thawm ṭha tawh bawk a, Pushpadanta palace leh state chhung hmun hrang hrang building pawimawhte pawh siamṭhat tura ruahman an ni bawk.

IGM Hospital hi Maharaja Bir Chandra Manikya Bahadur-a'n kum 1873-a a din a ni a, khum 30 awmin chanchin hriatreng tlak tam tak a lo nei tawh a ni. Kum 1900 khan British sorkar chuan Queen Victoria hriatrengna hmun atana siamin, Tripura lal hlui King Radha Kishore Manikya chuan he damdawiin hi khum 54 awm tura tilianin, khum 10 dang chu natna inkaichhawntheih vei te tan alo buatsaih bawk a, Victoria Memorial Hospital tiin a hming an thlak a ni.

Kum 1990 khan prime minister hlui Indira Gandhi hming chawiin damdawiin hming hi thlak leh a ni a, khum awm zat pawh 608 ah tihpun a ni a, nitin damdawiin a in entir hi 1200 - 1500 te an awm ṭhin. He damdawiin hi academic institution a ni tel bawk.