North East power transmission tihchangtlung nan vbch 10,000

Sorkar laipui chuan hmarchhak biala power semdarhna, transmission network tihchangtlun nan cheng vaibelchhe 10,000 a ruahman.

Assam Administrative Staff College, Guwhati-a ‘Conference of Power, Renewable Energy and Mines Ministers’ Ningania neihah Union Minister of State for Power (Independent) Piyush Goyal chuan hmarchhak state sorkarte chu power transmission project tluang taka kalpui a nih theih nan sorkar laipui thawhpui ṭha turin a ngen nghal.

"Hmarchhak biala power transmission leh sub-transmission network tihchangtlun nan cheng vaibelchhe 10,000 dah a ni a, a rang lama hnathawh a nih dawn avangin tluang taka project kalpui a nih theih nan sorkar laipuiin state sorkarte thlawpna a mamawh a ni," a ti.

Union Minister Goyal chuan India ramin kum 2019 aṭangin ni khata darkar 24 chhung power a neih theih tur thu sawiin, hemi tihpuitlinna atana ruahmanna rin­tlak siam chu state sorkar mawhphurhna a nih thu a sawi.

"Kum 2019 aṭang chuan India rampumin power chatlak loin a nei thei tawh dawn a, hemi atan hian state sorkar te ruahmanna siam kan mamawh a ni. Andhra Pradesh leh Rajasthan chuan an hmalakna tur tarlanna, action plan an thehlut tawh a, state dangte pawh thla ruk chhung hun pek an ni. State sorkarte chuan he thil hi an ngaihpawimawh a ṭul a ni," a ti.

Power Minister chuan India ramin power a neih tam tawk thu sawiin, power indaihloh state te tan an mamawh zat lei tur a awm reng thu a sawi bawk.

Goyal chuan kum 2014-15 chhunga power siamchhuah tura target, megawatt 17,830-ah power MW 22,566 siamchhuah a nih thu a sawi bawk.

Power semdarhna lamah Union Power Minister chuan kum 2014-15 chhunga transmission line ckm 20,882 leh transformation capacity MVA 47,871 siam tura target aṭangin ckm 22,100 leh MVA 65,554 siam a nih thu a sawi.

Union Power Secretary PK Sinha chuan power transmission line tihchangtlunna tur chu hmarchhak bial harsatna lian tak sutkianna tur a ni, a ti.

Union Renewable Energy Secretary Upendra Tripathy pawhin thu sawiin, power tam lam tehna megawatt aiah gigawatt (GW) hman an tum zawk thu sawiin, kum 2002-ah ni zung chakna hmangin solar power GW 175 siamchhuah an tum thu a sawi bawk.