Meghalaya sorkarin NE festival huaihawt dawn

India ram state dang­a mite leh hmarchhak mite inkara inlaichinna ṭha siam nan Meghalaya sorkar chuan vawiin hian New Delhi, Indira Gandhi Indoor Stadium-ah Northeast festival a huaihawt dawn.

Festival hi ni khat awh tur a ni a, hmarchhak mite hnam incheina, chaw, rimawi leh hnam lam chi hrang hrangte lantir a ni ang.

NE festival hi, "Songs and Dances of the North-East" tih niin, North East Council-in a sponsor a, President Pranab Mukherjee-a'n a hawng ang.

Meghalaya Chief Minister Mukul Sangma, NEC member te leh state dang hruai­tute pawh an tel beisei a ni.

Meghalaya Art and Culture Director M War Nongbri chuan festival huaihawt chhan sawiin, an thil tum chu hmarchhak mite leh India state dangte inkara inlaichinna ṭha siam a ni, a ti.

"State dang mipuite'n hmarchhak mite chanchin an hre tam lo a, ni khat awh NE festival kan huaihawt turah hian hmarchhak mite hnam lam chi hrang hrang leh rimawi te an hre thei dawn a ni," a ti.