Sorkar laipuiin M’laya ADC-te ṭanpuina pe dawn

Union Minister of State for Panchayati Raj Nihal Chand chuan Meghalaya-a autonomous district council (ADC) pathumte thuamchak nan sorkar laipuiin cheng vaibelchhe 4,500 ṭanpuina pek tur chungchang a ngaihtuah mek, a ti.

Union Minister Chand chuan he thu hi ADC pathuma official te Shillong-a meeting a neihpui hnuah Ningani khan a sawi, panchayati raj system kal dan ennawn tur leh a tihchak dan tur ngaihtuah tura Meghalaya tlawh a nih thu a sawi.

Chand chuan khawtlang inrelbawlna, local body hrang hrangah hmeichhia leh mipate'n intluktlang taka chanvo an neih a pawimawh thu a sawi a, hmeichhiate chuan an chanvo zawng zawng an luah khah vek a pawimawh thu a sawi bawk.

"Meghalaya chu hmeichhe thuneihna, matrilineal society ni mah se local body hrang hrangah hmei­chhia an tlem hle a, tuna panchayati system two-tier hman mek aiin three- tier panchayati system hman ni zawk se, hmasawnna a tam zawk ang. State sorkar chuan hemi chung­changah rawtna a thehlut tawh a, Panchayati Raj Ministry chuan a ngaihtuah dawn a ni." tiin Union Minister Chand chuan a sawi.

Chand chuan sorkar laipuiin Meghalaya-a district council system tihbo tumna a neih loh thu sawiin, an hmasawnna atan theih­tawp chhuaha thlawp leh ṭanpui a inhuam thu a sawi.

Union Panchayati Raj Minister Chand hian Meghalaya-a a cham chhungin ADC pathum- Khasi Hills Autonomous District Council, Jaintia Hills Autonomous District Council leh Garo Hills Autonomous District Council-a hmasawnna kalpui dan leh an inrelbawl dante a enpui a ni.