DoNER Minister-in Delhi-Dimapur inkarah thlawhtheihna service tur puang

Development of North Eastern Region (DoNER) Minister Jitendra Singh chuan Ningania North-Eastern Council (NEC) Plenary Meeting vawi 64-na New Delhi-a neihah thu sawiin, Nagaland, Dimapur leh New Delhi inkarah nitin thlawhtheihna service tir a nih tur thu a sawi.

March thla khan IndiGo Airlines chuan Kolkata leh Dimapur inkarah April 15 aṭang­in thlawhtheihna service tir an tum thu an lo puang tawh a, he thlawhtheihna hi Kolkata kal­tlanga New Delhi leh Dimapur inkarah service tir a ni nghal ang.

NEC Plenary meeting hawnnaah Jitendra Singh chuan inkalpawhna changthlung lo chu hmarchhak bial harsatna a ni, tiin Guwahati airport tihchangtlun tuma hmalak mek a nih thu a sawi bawk.

NEC meeting-ah hian hmarchhak bial Governor leh Chief Minister te bakah Union Ministry leh state senior official te pawh an tel.

"Nagaland chuan hun rei tak kalta aṭangin New Delhi leh Dimapur inkara thlawhtheihna service neih an phut tawh a, IndiGo airlines chuan an service tir tur thu puang tawh mah se Kolkata kaltlang thoin a ni a, passenger te tana a ṭhatna chu Kolkata-ah an thuamhnaw leh bungruate an hlan thlak a ngai tawh loh bakah transit passenger te angin thlawhtheihna aṭanga an chhuk kher a ngai tawh dawn lo a ni," tiin official pakhat chuan a sawi.

Meeting-ah hian DoNER Minister Singh chuan hmar­chhak state hrang hrangah a inchhawka DoNER camp office hawn a nih thu tarlangin camp office chu “DoNER at Doorstep” (DAD) tia sawi a ni, a ti.

Union Minister of State for Home Affairs Kiren Riji­ju pawhin thu sawiin, state tinte'n an hmasawnna atana an ngaihpawimawh turte chu state sorkarte rawn a, sawi ho ṭhin a nih tur thu a sawi.

"Politics chuan hmasawnna kawng a dal tur a ni lo a, central ministry te leh state sorkar te'n thawh hona ṭha an nei bawk tur a ni," a ti.

Thil ruk chingte chu hmar­chhak bial harsatna a nih loh thu leh hmasawnna project kalpuinaa eiruk chingte chu hmar­chhak biala tihbo ngai a nih thu Rijiju chuan a sawi bawk.