NESO in Manipur tlawh turin PM Modi an phut
Northeast Students’ Organisation (NESO) chuan kum khat chuang zet Manipur tualchhung buaina a thlen hnuah, prime minister Narendra Modi a la ngawi reng chu a dem tu sawiin, Manipur state hi vawi khat tal tlawh a, buaina chinfel dan ngaihtuah tura an phut thu an sawi.
NESO hian Prime Minister leh union home minister Amit Shah te chu lehkha thawnin, hun rei tak Manipur tualchhung buaina thleng chuan mipuite nunphung leh khawsak a tibuai tawh hle tih an sawi a, a khat tawkin nawrh huaihawt, kawng dan leh hnam inkara inbeihna a thleng fo a ni, an ti. Sorkar laipui chu boruak ralmuang a awm a, state mipuiten nunphung pangngai an zawh leh theihna tura a kaihhnawih pawl hrang hrangte inbiakna awmze nei tak neihpui turin an phut tih zirlai pawl chuan an sawi bawk. Tuna an buaina chu la ṭha lo viau mah se, PM Modi chu a inrawlh chuan buaina chinfel kawngah a pui hle dawn nia an hriat thu an sawi a ni.
Internet service pe chhuak
Manipur sorkarin buaina chhuak vanga valley district pangaa broadband connection-a internet service a tih tawp lailawk chu a pe chhuak leh ta.
State khawpui, Imphal-a zirlaiten lungawi lohna an lantirna avanga buaina a chhuah avangin state sorkar chuan ni thum chhung internet service - mobile data leh broadband connection a ti tawp a ni. Mahse Ningani aṭang khan broadband bikah internet service hi district panga - Imphal West, Imphal East, Thoubal, Bishnupur leh Kakching-ah pek chhuah ni mah se, mobile data service erawh chu tih tawp chhunzawm a la ni dawn thung.
Imphal West district drone hmanga beih a nih avangin Meitei zirlaite hian nasa taka lungawi lohna lantirin, September 10 tlai dar 3 aṭang khan mobile data leh internet service chu tih tawp lailawk a ni.Hei hi buaina punlun zel tur venna atan leh,
video hmuh nuam lo leh thu dengkhawng tak tak thawnchhuah tur laka him tlan zawk naa tih a ni.
Security force-ten ralthuam ṭhahnem tak man
Security force-ten Churachandpur leh Kangpokpi district-ah silai, silaimu leh puak thei thil ṭhahnem tak an man.Indian Army, Manipur police, Central Reserve Police Force (CRPF) leh Border Security Force (BSF) ṭangkawp chuan Churachandpur leh Kangpokpi district-ah darkar 48 awh ralthuam dap beihpui an thlak tih defence thupuangtu chuan a sawi.
Ningani, September 11,2024 khan Army, Manipur police leh CRPF-te chuan Churachandpur distict-a awm, Maulsang hmunah ralthuam an dap tih a sawi bawk.
Ralthuam dap beihpui thlakah hian, security force inzawmkhawmte chuan 7.62 mm AK series assault leh silai mu, tualchhung siamchawp mortar, pompi tia hriat lar leh ralthuam dangte an man a ni.
Nimin khan Army chuan Manipur police leh BSF-te nena thawk hoin Kangpokpi district-a ramngaw hmunah te ralthuam an dap chhunzawm bawk. M-16 rifle siam danglam, tualchhung siam rocket, tualchhung siam mortar lian, silaimu round eng emaw zah leh ralthuam dangte an man.
Heng an ralthuam mante hi chhui chian turin state police-te hnenah hlan an ni.
Ralthuam ṭhahnem tak man a ni hian helpawlte hma lak tumna nasa takin a ti ṭhuanawp dawn a, security force-ten state chhunga remna leh muanna a awm leh theih nana an inpekna a ti lang a ni, tiin defence thupuangtu chuan a sawi.