Assam : Sonapur-a buaina chhuakah mi 2 an thi

Assam-a Sonapur area-a Ningani, September 12,2024-a sorkar rama awmte sawnchhuah hna thawhnaah tualchhung mite leh police-te an innawr buai a, police-te silai hmehpuahah mi pahnih an thi a, mi 11 in hliam an tuar. Hliam tuar zingah hian police pathum an tel.

Police-te chuan sorkar rama awmte sawnchhuah hna, eviction drive an neih chhungin sorkar official 22 in hliam an tuar tawh a, an zingah hian ngaihtuahawm tak tak pawh an awm niin an tarlang.

District roreltute chuan September 9, Thawhṭanni aṭang khan Guwahati aṭanga km 35 vel chauha hla, Sonapur area-ah hian sorkar rama awmte sawn chhuah hna hi an kalpui ṭan a, Ningani khan a ṭum thumna atan an kal leh a ni. Chief minister Himanta Biswa Sarma chuan sawnchhuah tura tihte hi Sonapur tribal belt-a sorkar rama khawsa te an ni tih buaina a chhuah hnu hian a sawi.

Ni hnih chhung chu tluang tak leh buaina awm loin an in chhuahtir hman a, mahse Ningani chawhnu lam aṭangin tualchhung mi, civil official te leh police te inkarah buaina hi a chhuak ṭan a ni. Tualchhung mite hi tiang nen an thawk chhuak a, police-te hian hnawh darh nan silai an hmetpuak ta nia sawi a ni.

Buaina chhuah ṭanna tak hi insawnchhuah tumte hi an inthiar chhuah hman hmaa an awm nate official lamin an lo tih chhiatsak vang nia sawi a ni. An thawmhnaw leh bungrua dah khawmte hi official lam hian an lo paih darh niin an sawi.

Assam police-te tarlan danin, an state-ah hian sorkar ram 248 bigha (155 acre) leh danin a phal loha in sak 237 te chu ṭhiatin an thianfai tawh tih an sawi. Anti-encroachment drive hi September 9 aṭang khan an kalpui a ni.