Act East Policy atan hmarchhak bial pawimawh: President Pranab

President Pranab Mukherjee chuan Inrinni khan New Delhi-a Northeast Festival a hawnnaah thu sawiin, sorkar laipuiin Act East Policy a kalpuinaah hmarchhak bial chu a pawimawh thu a sawi.

"Act East Policy kalpuinaah hmarchhak bial chu a pawimawh a, a hlawhtlinna kawngah mawhphurhna nasa tak a nei a ni. ASEAN ram 10 te nena thawh hona leh inlaichinna ṭha siamna tur a ni a, chu chu hmarchhak bial pawhin a hlawkpui thei a ni," a ti.

President chuan hmarchhak bial chu India ram bung pawimawh tak a nih thu sawiin, mihring tam lo mah se India ram zalenna atana nasa taka tha thawhtu a nih thu a sawi.

Hmarchhak bial politician te chu India ram politics kalphung tihausatu an ni, tiin ramngaw leh nungcha lama hmarchhak leilung hausana te, leilung mawina te leh culture dangdai tak tak te chu India ram dangte nena inkar zau lutuk tizimtu an nih tur thu a sawi.

Northeast Festival hi “Songs and Dances of the North East” tih niin, North Eastern Council bultuma, Meghalaya sorkar huaihawt a ni.

DoNER Minister Jitendra Singh pawhin thu sawiin, India ram state dangte hmaa hmarchhak bial mite chanchin puandarh nan festival chu huaihawt a ni, a ti.

Singh chuan Northeast festival chu huaihawt zel a nih tur thu leh a thil tum turte chu a huaihawttu state azira tihdanglam zel a nih tur thu a sawi bawk.