China-in Arunchal ram a chuh AAPSU-in dodal

Chinese Foreign Ministry-in Arunachal Pradesh chu ram inchuh a tih vanga lungawi lo All Arunachal Pradesh Students’ Union (AAPSU) chuan kar kalta Inrinni khan China thuchhuah dodalna a lantir.

AAPSU president Kamta Lapung chuan, "Arunachal Pradesh chu ram inchuh a ni lo a, India ram bung khat a ni. China thuchhuak hi kan dem tak zet a ni," a ti.

China Foreign Ministry thupuangtu Hu Chunying chuan tun hnai khan Arunachal chu India nena ram inchuh thubuai an neihna a ni, a ti a, Arunachal ram inchuh thubuai chu phat rual a ni lo, a ti.

Arunachal zirlai pawl hotu Lapung chuan Arunchal chunga China hmalakna dan chu an lo dodal ṭhin tawh thu sawiin, China thuneitute nen inzawmna engmah an neih loh thu a sawi.

North East Students’ Organisation (NESO) coordinator Bai Sonam pawhin Arunchal ram chuh theih turin China-in chhan rintlak tak a neih loh thu a sawi bawk a, Arunachal mite hnena stapled visa a pe ṭhin chu sorkar laipui chak loh vang a ni, a ti.

Arunachal district 12-a Armed Forces Special Powers’ Act (AFSPA) lekkawh a nih chung­changah AAPSU chuan hlih a nih hma loh chuan nawrh huaihawt zel an tum thu an sawi bawk.

"AFSPA chu eng dan mah ni loin ram ralmuanga tak Arunchal-a pawisawilote thahna tur mai a ni. Arunachal-in helpawl pakhat mah a nei lo. Arunachal-ah helpawl an lut a nih chuan AFSPA lekkawh kher loin beihpui a thlak thei a ni," tiin Lapung chuan a sawi bawk.