Congress-in CM ban an phût
Chit fund company te'n sum peipun tumte sum an tihchingpensak thubuaiah inhnamhnawiha puhin Tripura Congress party chuan Chief Minister Manik Sarkar ban an phût.
Tripura Congress ṭhalai pawl hotu Susanta Chowdhury chuan Chief Minister chu chit fund company te thehlartu a ni, tiin Rose Valley te programme buatsaiha tel ṭhinah a puh bawk a, mipuite chu chit fund company te hnena an sum peipung turin a fuihphur a ni, a ti.
Chowdhury chuan Chief Minister Sarkar chu West Bengal transport minister hlui Madan Mitra ang chauh a ni, tiin a sawi bawk. West Bengal Minister hlui Madan hi chit fund company te sum tihchingpen kaihhnawihah jail a tâng mek a ni.
"Bengal Minister hlui Madan Mitra chu Sarada group neitu Sudipta Sen nena inhnimhnai tak an nih avanga Central Bureau of Investigation (CBI)-in thu a zawhfiah hnua jail an tantir thei a nih chuan eng vangin nge Chief Minister Manik Sarkar pawh thu an zawhfiah theih loh ang?" tiin Chowdhury chuan a sawi.
Congress hotu Chowdhury chuan chit fund company te'n Tripura-ah sum peipun tumte pawisa cheng vaibelchhe 160 chuang an tihchingpensak a, sum dahtute'n an neihlet leh thei nan Congress chuan theihtawp chhuahin hma a la mek a ni, a ti.