Mipuiin Dokmoka army camp an hual

Assam, Karbi Anglong disrict-a Army te'n hmeichhe pathum an pawngsual avanga lungawi lo mipui pungkhawmte chuan kar kalta Zirtawpni tlai khan pawikhawihtu man chhuah thuai phutin Dokmoka army camp an hual.

Army camp hualtu, mipui pungkhawmte hian camp hungna tihchhiat tumin, luhkhung an tum a, Dokmoka police te nen an innawrnaah zirlai leh police eng emaw zatin hliam an tuar.

Karbi Anglong Superintendent of Police MJD Mahanta chuan pungkhawmte hnawhdarh nan tear-gas leh rubber bullet an hman thu a sawi a, mipuite'n police te hi lungin an beih thu a sawi bawk.

Hetihlai hian pawl hrang- Karbi Nimso Chingthur Asong, All India Progressive Women’s Association, Karbi Students Association leh Human Right Organizations ṭangrualte chuan nimin khan Karbi Anglong district-ah lungawi lohna lantirin darkar 24 chhung bandh an huaihawt a ni.

All India Progressive Women’s Association chuan hmeichhe pathum pawngsualtu army te chu man chhuah thuai an phut a ni.

April 6 khan Indian Army, Jat Regiment mite chuan Dokmoka khaw bula, Sarthe Tokhi khuaah hmeichhe kum 50 mi bakah kum 38 mi a monu leh a fanu kum 15 mi an pawngsual a ni.