Meghalaya-a ‘Gau Dhwaj Yatra’ dang turin sorkar nawr

Gau Pratishtha Andolan (GPA) in bawng talh khapna leh bawng humhalh na, ‘Rashtra Mata’ dinhmuna bawng chawikanna tur 'Gau Dhwaj Yatra’ neih a rawt chu Meghalaya state chhunga kalpui a nih ve loh nana dang turin pawl hrang hrangin sorkar an nawr.

GPA thuchhuahin a tarlan danin, 'Gau Dhwaj Yatra' October 2-a Meghalaya-a neih tum a ni. Kar liam ta Ningani khan Shillong Press Club-a press conference neih an tum chu Hynñiewtrep Youth Council (HYC) mi leh saten an dodal avangin an ṭhulh bawk. HYC member-te hian bawng talh duhlohna kawngzawh Meghalaya-a neih tum an duhlohzia tarlanna thuziakte an keng a ni

Zirtawpni khan HYC leh Hynñiewtrep Integrated Territorial Organization (HITO) pawlte chuan a hran ve vein chief minister Conrad Sangma hnenah lehkha thawnin, yatra neih rawtna chu tih puitlin a nih loh na tura hma la turin an ngen.

“Hetiang thil hi state chhunga Kristian tam tak awmte chhaih kawlh tumna niah a ngaih theih. Bawngsa hi Hynñiewtrep leh Achik hnamten chaw a an rin ber a ni a, kum za chuang an lo ei tawh. Kan rama hetiang thil rawt hi, ei leh in duhzawng thlan theihna chanvo kan neih rahbehna a ni” tiin HITO chuan an ziak.

“He yatra hi kaltlangpui a nih a, bawng puanzarte kan rama zar a nih chuan, kan pawlin a niah vek hian Himas 25 puanzar kan zar ve ang a, kum 75 chuang kan chanvo min pek loh, a bikin Inner Line Permit (ILP) leh Autonomous District Council (ADC) te kan ngiat ve ang,” tiin lehkha chuan a tarlang.

Chief Minister hnena lehkha an thawnah hian HYC chuan bawngsa ei chu Meghalaya mipui tam zawkte nuna bet a nih mai bakah, state chhunga bawngsa hralha eizawng mi sang chuangte tan sum hnar a nih thu an sawi. Mi dangte ei leh inah thu neih an tum loh rualin, pawl emaw thuneituten emaw an ei leh in duh zawng leh rindante ṭawmtir an tumna chu do thu HYC chuan an sawi.

Hei bakah hian ‘Nu’ te hi Hynniewtrep hnamah dinhmun pawimawh tak an chelh a, bawng emaw ui emaw nena in tehkhin chu an khawtlangah khap a nih avangin bawngte chu an ‘Nu’ te an ni tia inzirtirna hrim hrim chu a tawp thlengin an do dawn tih HYC chuan an tarlang bawk.