Manipur buaina chhui chianna report Nov 20 hmaa thehlut turin Probe Panel hriattir

Sorkar laipui chuan kar liam ta Zirtawpni khan May 3, 2023-a Manipur tualchhung buaina chhuak chungchang chhui chiang tura nikum June thlaa Justice Ajai Lamba kaihhruai commission din chu November 20 aia tlai loa report thehlut turin a hriattir.

Commission dinah hian member pathum awmin, IAS officer Himanshu Shekhar Das leh ex-IPS officer Aloka Prabhakar te pawh an tel a ni.

Home ministry chuan June 4, 2024-a hriattirna a lo tih chhuah tawh chu siam ṭhain Zirtawpni khan notification thar a ti chhuak a, “Commission chuan sorkar laipui hnenah a hma thei ang berin report a thehlut tur a ni a, November 20 hma ngei a ni tur a ni”a ti.

Notification chhuah hmasa berah khan commission chu thla ruk hun pek a ni a, mahse commission hmalak dan tur order hi August 9, 2023-ah tihchhuah niin Manipur sorkar chuan August 26, 2023-ah a hriattir chauh a ni. Hei vang hian, Manipur-ah buaina a chhuak reng chungin, commission chu thla ruk aia rei hun pek belh zel a ni.

Commission chu May 3, 2023-a hnam hrang hrang inkara tualchhung buaina chhuak leh chumi ina a hrin tharum thawhna dang thlengte zirchiang tura din a ni. Khawi lai aṭang nge buaina hi a inṭan, buaina chhuak kaihhnawih thil thleng zawng zawngte leh sorkarin a tihtur tih loh a nei em tihte zirchiang tura beisei a ni.

Sorkarin buaina chhuak tireh tura hma a lakna tawhte enfiahin, sorkar hmalakna chu a tawk em tihte a ngaihtuah tel ang.