Assam-in trading scam case 32 CBI kutah hlan dawn: CM Himanta Biswa Sarma

Assam chief minister Himanta Biswa Sarma chuan dan loa online hmanga sumdawnna kaihhnawih case-te chu Central Bureau of Investigation (CBI) hnenah an hlan chhawng thuai dawn tih a sawi.

Cabinet meeting, Zirtawpni liamtaa neih zawhah CM chuan Assam-ah dan loa sumdawnna kaihhnawih case 32 ziahluh a ni tawh thu thuthar lakhawmtute a hrilh. Heng case-te hi a nghawng a thui em avangin sorkar chuan CBI hnenah a hlan chhawng thuai dawn, tiin, union home minister Amit Shah pawh a sawipui tawh thu a tarlang.

State sorkar leh police-te chuan hetiang inbumna dang state chhunga a awm leh awm loh an thlithlai reng tih CM chuan a sawi bawk. Case 32 bakah hian, hetiang ang chi case hmuhchhuah an neihte chu CBI hnenah an pe tel dawn tih a sawi a ni.

Assam state chhungah hian online-a sumdawnna hmanga inbumna nasa tak a thleng a, sum chevel hi vaibelchhe za chuang a ni. Hemi kaihhnawihah hian mi panga man a ni tawh.