BTC inthlanah BPF-in Hnehna a chang BJP leh Congress an che chhia

Bodoland Territorial Council (BTC) inthlan result chu kar kalta Inrinni, April 11 khan vote chhiar hnuah puan a ni a, Bodoland People’s Party (BPF) chu party mala seat la hnem ber niin, hnehna a chang.

Seat 46 awmna Coun­cil-ah hian April 8 khan seat 40-ah inthlanna neih a ni a, BPF chuan seat 20 an la a ni. Seat 6 hi Assam Governor-in a nominate ṭhin a ni.

Hagrama Mohilary-a kaihhruai BPF hian kum 2005-a inthlanna neih hmasa ber aṭangin vawi thum inthlanna neih tawhah hnehna a la chang vek a ni.

Coordination for Demo­cratic Rights (PCDR) chuan seat sarih an la a, inde­pendent candidate te'n seat riat an la bawk. All India United Democratic Front (AIUDF) pawhin seat li a la bawk.

BTC inthlanah hian national party lian pahnih- BJP leh Congress an chhe hle a, BJP-in seat khat an la a, Congress-in seat lak a nei lo thung.

PCDR hi Bodo mite party 13 leh non-Bodo party inzawmkhawm an ni a, Bodoland People’s Prog­ressive Front (BPPF) leh All Bodo Stu­dents’ Union (ABSU) te'n an thlawp bakah inde­pendent candidate te'n an thlawp bawk.

BPF hian Pathianni tlai khan Kokrajhar-a, Bo­dofa Cul­tural Complex-ah Hag­rama Mohilary kaih­­hruaina hnuaiah exe­cutive meeting a nei nghal a, sorkar siam dan tur an sawiho.

BTC-a sorkar siam dan tur chungchangah BPF hotute chuan nimin khan Assam Governor PB Acharya an hmu nghal a ni.