Tripura-ah crime rate a tla hniam

Kum kalta khan Tripura-ah pawikhawihna leh hmeichhiate chunga hleilenna thubuai thleng zat, crime rate 18%-in a tla hniam.

Kum 2014, April aṭanga kum 2015 March thleng khan pawikhawihna thubuai 5,347 ziahluh a ni a, kum 2013-14 April aṭanga March thla thleng khan police te'n thubuai 6,537 an ziaklut a ni.

Tripura Police department chuan thuchhuah a siamah he thu hi tarlang a, kum 2013-14 leh kum 2014-15 inkara crime rate tlak hniamna hi 18% a ni, a ti.

"Tripura hi Bangladesh nen ramri kilometre 856-a thui an inṭawm a, Assam nen km 53 leh Mizoram nen km 109-a thui a inṭawmpui bawk a ni. Hetihlai hian Tripura Police chuan state chhunga dan leh thupek lekkawh kawngah theihtawp a chhuah a ni," tiin police thuchhuah chuan a tarlang.

Dan leh thupek dinhmun siamṭhatna atana police te tihchangtlun nan, police station hawn belh a ni a, Community policing programme- “Prayaas” hnuaiah police leh vantlang mipuite thawh hona leh inlaichinna ṭha siam a ni bawk a, police intelligence network tihchak a ni bawk.

Police thuchhuah chuan hmeichhiate chunga hleilenna thubuai chu 15% a tlak hniam hnu thu a tarlang bawk a, kum 2013-14-a thubuai 1,785 ziahluh aṭangin kum 2014-15-ah chuan thubuai 1,516-ah a tla hniam a ni, a ti.

Police official chuan state sorkarin all-women police station panga a hawn tawh thu sawiin, polcie station 71-ah hmeichhiate thubuai bawhzui turin 'women’s desk' siam a nih thu a sawi a, district pariatah all-women police station hi hawnbelh a nih tur thu a sawi.

Home porfolio changtu, Chief Minister Manik Sarkar chuan hmeichhe police pawh lak belh zel an tum thu a lo sawi tawh a, police personnel zawng zawng aṭanga hmun thuma ṭhena hmun khat chu hmeichhia an nih tur thu a sawi.

Tripura Director General of Police K. Nagaraj chuan hmeichhiate chunga pawikhawihna thubuai leh road traffic accident chu police te thil ngaihmawh a nih thu sawiin, a chinfel nan theihtawp chhuaha hma lak zel an tum thu a sawi.

DGP chuan Tripura police te India ram state dang police te tan pawha entawn tlak a nih thu sawiin, dan leh thupek lekkawh kawngah te leh crime management-ah pawh entawn tlaka an nih zel tur thu a sawi bawk.

Kum 2012 khan Tripura police te hian an hnathawh ṭhat avangin “President’s Colours” chawimawina an dawng tawh a, he chawimawi dawng thei pali-na an ni.