BJP president-in Shillong tlawh dawn

BJP national pre­sident Amit Shah chuan state party hotute nena meeting nei tur leh an party dinhmun zirchian tumin April 22 hian Shillong a tlawh dawn.

Party president Shah hian Shillong bakah hmarchhak state khawpui dangte pawh tlawh a tum bawk.

BJP thupuangtu chuan party president-in hmarchhak bial a tlawh chhan sawiin, hmarchhak mipuite chu lamṭanga siam an tum thu a sawi a, Meghalaya BJP-in membership enrolment drive an neih mek chu enpui nghal a tum thu a sawi bawk.

Meghalaya hian kum 2018 hian state assembly election a nei dawn a, Assam-in kum 2016-ah a nei bawk ang. Hemi atan hian a hma lama an lo inbuatsaih lawk theih nan BJP president Shah chuan hmarchhak bial tlawh a tum niin an sawi.

Meghalaya BJP unit hi kum 1991 khan din a ni a, kum 1998 state assembly inthlanah party MLA pathum an nei a, kum 2008 inthlan khan party candidate A.L. Hek chu Pynthorumkhrah bial aṭangin thlantlin a ni a, mahse Hek hian kum 2009 khan rorellai Congress a zawm a, kum 2013 inthlanah Congress aṭang inthlan chuhin thlan tlin leh a ni. Hemi hnu hian BJP hian Meghalaya assembly-ah seat a la tawh lo.