AFSPA hlip turin Arunachal MP Ninong Ering-an PM Modi ngen

Arunachal Pradesh Lok Sabha MP Ninong Ering chuan Prime Minister Narendra Modi chu lehkha thawnin, Armed Forces Special (Power) Act (AFSPA) hlip turin a ngen.

Sorkar laipui chuan March 27 khan thuchhuah siamin Assam ramri hnaiha Arunachal district 12 chu AFSPA tlawhchhanin, disturbed area-ah a puang a ni.

AFSPA chuan Arunachal-a mihring nuai 13 chuang a ṭha lo lamin a nghawng dawn a ni, tiin MP Ering chuan lehkha thawnah hian a tarlang.

Arunachal East constituency aṭanga Congress party aiawha MP thlantlin Ering chuan Arunachal state ralmuang taka AFSPA lekkawh a nih chhan sorkar laipui aṭanga hriat a duh thu a tarlang bawk.

Hetihlai hian All Nyishi Students’ Union (ANSU) pawhin AFSPA lekkawh a nih chungchangah thuchhuah siamin, sorkar laipui thutlukna chu vanduaithlak an tih thu an tarlang a, AFSPA chu hlip tura sorkar an phut thu an tarlang tel bawk.

Hetihlai hian Union Minister of State for Home Kiren Rijiju chuan Arunachal-a AFSPA lekkawh a ni chu ennawn turin Home Ministry official te a hriattir thu a sawi.

Rijiju chuan Assam helpawl, Songbijit-a kaih­hruai National Demo­cratic Front of Bodoland (NDFB-S) te laka beihpui thlak a nih avangin Assam-Arunachal ramri bial chhungah AFSPA lekkawh a ni, a ti a, AFSPA lekkawh chu state sorkarin a thlawp lo a nih chuan state sorkar leh mipuite duhdan chu kan zahsak tur a ni, a ti.

"Helte lak aṭanga ram venhim chu Ministry of Home Affairs mawhphurhna a ni a, state sorkar nen thawh hoin theihtawp chhuahin a bei zel a, NDA sorkar chuan ram mipuite duhdan angin state sorkar nena thawh hona ṭha neih zel a duh a ni," a ti.

Arunachal MP, Union Minister Rijiju chuan democracy sorkarah sorkar chuan thuneihna pumhlum neiin ro a rel thei lo, a ti a, AFSPA chungchangah pawh Arunachal Pradesh Home Minister Tanga Byaling a bepawp reng a ni, a ti.

Rijiju chuan AFSPA chungchang chu ennawn an tum thu leh kawng dang dap turin state sorkar ngaihdan lak an tum thu a sawi bawk.