Textile park atan Manipur-in investor-te hip a tum

Manipur state khawpui, Imphal daia Textile park hawn tur atan Manipur sorkar chuan investor-te hip a tum.

State sorkar chuan Asia chhim chhak lam hnaiha awm a nih avangin Manipur chu 'Act East’ policy kalpui mekah a pawimawh thu a tarlang a, state chhunga dan leh thupek lekkawh kawngah harsatna awm ṭhin mah se investor-te himna chu a ngaihpawimawh tur thu a tarlang bawk.

Sorkar laipuiin hmarchhak bial ngai­pawimawh a, hmasawnna hrang hrang thlen­tir tuma a beih mek chu Manipur chuan remchanga lak tumin investor tam zawk hip luh a tum a ni.

Manipur Commerce and Industry Minister Govindas Konthoujam chuan, "Textile park hawn turah investor te chu remchang lo zawng turin kan ngen a, Manipur chu Asia chhim chhak lam luhka a nih avangin hmun pawimawh a ni a, India sorkarin a Asia chhim chhak lama a ṭhenawm ramte nen sumdawnna leh thawh hona ṭha siam tuma hma a lakna, ‘Act East’ policy a kalpui mekah Manipur chu sum thehchhuahna remchang a ni," a ti.

Imphal daia textile park hawn turah hian company ṭhenkhat- Mumbai-a hmunpui nei, Etco Denim leh Surat company, Triveni Rayons, Narmada Polyfab leh Fairdeal Textile Park te chuan unit hawn an hreh loh thu Minister Konthoujam chuan a sawi bawk a, heng company te hian zirchianna nei turin Manipur tlawh thuai an tum thu a sawi bawk.

State Commerce and In­dustry Minister chuan an har­satna tarlangin Manipur chu hel tamna state a nih avangin investor te himna chungchang leh power supply ṭha lo chu an harsatna lian tham a nih thu a sawi a, he harsatna sutkian nan hian theihtawp chhuaha hma an lak tur thu a sawi bawk.

Union Minister of State for Textiles Santosh Gangwar chuan kumin March 24-a Manipur a tlawh ṭumin Textile park-a 'Apparel and Garment Making Centre' leh 'Powerloom Estate' dinna tur lung a phum a, hmarchhak biala textile industry tihchangtlun nan sorkar laipuiin cheng vaibelchhe 400 a ruahman thu a sawi.

Manipur Commerce and Industry Minister Konthoujam chuan textile park chu a hlawhtlin ngei tur thu sawiin, sorkar laipuiin senso, 80% a tumsak tur thu a sawi a, private investor leh state sorkarin 10% ve ve an tum dawn a ni, a ti.

Textile park atan hian state sorkar chuan ram acre 70-a zau a ruahman fel tawh a, acre 60-a zau neih belh tumin hma a lak mek a ni, a ti.