Tuki-a'n NEC mawhphurhna ennawn a duh

Arunachal Chief Minister Nabam Tuki chuan Niti Aayog-a Planning Commission thlak a nih vang leh 14th Finance Commission (FC) rawtnate a danglam tak avangin North Eastern Council (NEC) mawhphurhna chu ennawn a duh thu a sawi.

Tuki chuan kar kalta Zirtawpni, April 10-a New Delhi-a NEC Plenary meeting neihah he thu hi a sawi a, NEC chu regional planning body a nih angin a mawhphurhna leh a thuneihna chu thil dang aia ngaihpawimawh ṭul a tih thu a sawi.

Arunachal Chief Minister chuan Planning Commission aiah NITI Aayog a awm tak avangin states tinte hnena hmasawnna fund pek dan pawh nasa taka tihdanglam a ni, a ti a, hei vang hian Planning Commission chunga innghat, Special Category States te'n fund pek dan danglam chu nasa takin an tuar mek a ni, a ti.

14th FC-in Central tax aṭanga state share, 32% aṭanga 42%-a tipung chu lawmawm a tih thu a sawi bawk a, Centrally Sponsored Schemes (CSS) ṭhenkhat sorkar laipuiin a tihtawp avangin Special Category States te'n plan fund-ah harsatna an tawh phah bawk, a ti.

Chief Minister Tuki chuan Arunachal Pradesh anga special category states-a awmte tana CSS-a funding pattern 90:10 chu a ngai anga kalpui zel a duh thu a sawi bawk.

NITI Aayog hnuaiah Regional Council siam a nih dawn avangin Tuki chuan NEC kal zel dan turah zawhna a siam bawk.