Nagaland-ah Tualchhung aṭanga hri kai chhawng an tam

Nagaland health official-te chuan an state-ah tualchhung aṭanga Covid-19 kai an pung chak hle tih an sawi. 

Sorkarin hri darh tur venna atana khuahkhirhna a siamte chu mi tam takin an zawm ṭha lo tih sawiin, hei vang hian hri kai chhawng hi an pung chak tih an sawi. Kohima-a press conference a neihah, health and family welfare department principal director, Dr Vizoli Z Suokhire chuan lockdown thlahdul a nih chhoh hnuah mi tam tak an an inthlahdul chho a, Covid-19 norms ten zawm a hlawh ṭha lo hle niin a sawi. "Mi tam takin hri leng chu a reh taah an ngai mai niin a lang. Social distancing dante chuan an theihnghilh a, pawn chhuahnaah mask an vuah ṭha lo hle bawk a ni," tiin a sawi. 

Contact tracing aṭanga hri kai hmuh belh an pung zel chu ngaihven ngai tak a ni tih health official chuan sawiin, tualchhung aṭanga hri kai chhawng hmuh chhuah hi kar liam ta khan 19% an tling tawh tih a sawi bawk. 

September 1-5 chhung khan Nagaland-ah Covid-19 kai hmuh chhuah hi 178 an awm a, an zinga 68 chu tualchhung aṭanga kai an ni a, frontline worker zingah hri kai hmuh chhuah hi 24 an tel bawk a ni. Tualchhung aṭanga kai zinga 50% chu an hnathawhna hmuna positive awmte aṭanga  kai niin, 40% chu in lam aṭanga an kai an ni a, 4% chu mipui punkhawmna hmun aṭanga kai niin, 3% chu hospi­tal aṭanga kai an ni. 

Health official chuan an state chu thla thum chhung green zone a ni hman a, mahse May thla tawp lama state pawn lama tangkhangte an haw khawm hnuah hri kai hi an hmuh chhuah niin, tun thlengte hri kai hmuh tawh zingah 32% chu hmun dang aṭang haw an nih thu a sawi.