Guwahati police te'n MLA Rumi Nath an man

Assam Congress MLA Rumi Nath chu nimin khan car ruk thubuaiah Guwahati police te'n an man.

MLA Rumi hi Mumbai leh Delhi-a car ruk thubuaia inhnam­hnawih Anil Chauhan nen thawk dun a, Anil-a hi vehicle pass siamsakah puh a nih vangin man a ni a, Anil pawh hi Guwahti police te'n tun hnai khan an man a ni.

Congress party chuan MLA Rumi hi puh a nihna thubuai kaihhnawihah insawifiah turin a hriattir tawh bawk.

MLA Rumi hian car ruk hmang Anil-a chu Assembly compound chhunga luh phalna, vehicle pass a siamsak niin an sawi a, state Assembly Secretariat pawhin hemi kaihhnawihah hian insawifiah turin a hriattir bawk.

MLA Rumi-i'n a ngensak angin Assembly Secretariat chuan Anil-a hnenah hian Assembly compound luh phalna, vehicle pass vawi thum a siamsak a ni.

Assembly Secretariat dan ang chuan MLA emaw minister te'n assembly compound chhunga a car luhna phalna a neih theih bakah a chhungte leh ṭhiante tan motor panga luh phalna a ngensak thei.

Anil-a hi India rama lirthei bo thubuaiah police te'n nasa taka an zawn a nih vang leh MLA Rumi-i'n vehicle pass a lo siamsak avangin Guwahati police chuan MLA Rumi hi thu zawhfiah atan an man a ni.

April 7 khan Guwahati police leh Central Reserve Police Force (CRPF) ṭangrual te chuan beihpui an thlaknaah Anil-a hi Guwahati, Azara hmunah an lo man tawh bawk.

Rumi Nath hi kum 2006 khan BJP ticket aṭangin Barkhola bial­ah MLA-a thlantlin a ni a, kum 2010-ah Congress zawmin, 2011 state assembly inthlanah Congress ticket-in MLA-ah thlantlin a ni.