Rose Valley agent te'n Agartala-ah lungawi lohna lantir

Agartala-a sum peipunna company, Rose Valley agent 500 chuang chuan Pathianni khan company hotu Goutam Kundu man a nih vang leh an account khawih chet theih loha dah a nih avangin lungawi lohna an lantir.

Agent te hian Rose Valley office panin kawng an zawh a, Central Bureau of Investigation (CBI) leh Enforcement Directorate (ED) te chu Rose Valley account khawih chet theih loha dah a nih chhanah mawhphurtua puhin an laka an lungawi loh thu ziak an tarchhuak a ni.

Agent te chuan account chu khawih theih a nih chuan tualchhung mi pawisa dahtute hnenah tal an pawisa an pekkir theih tur thu an sawi a, account khawih chet theih loha dah a nih avangin an bial­ah ṭheuh harsatna lian tak an hma­chhawn mek thu an sawi.

Agent pakhat chuan an hnena pawisa dahtute hnenah an pawisa dahte an pekir thei lo a nih chuan thih mai an hmabak tih a sawi a, Rose Valley chuan anmahni kaltlangin sum peipun tumte pawisa an lak thu leh Rose Valley-a inbumna awm chu an hriatpui loh thu a sawi.

Agent pakhat chuan kum 2011-a Rose Valley agent hna a thawh aṭangin a chhungte leh an vang mite hnen aṭangin an hnena sum peipun tur cheng nuai 12 chuang a khawnkhawm thu a sawi a, mahse tunah chuan a chhungte leh veng mipui­te chuan anmahni bumtua an ngaih tawh thu a sawi bawk.

Agent te nawrhnaa tel pakhat chuan Rose Valley te thubuai neih chhanah politician te a puh a, Left Front sor­kara thuneitu ṭhenkhat chu Rose Valley te nena thawk ho an nih thu a sawi bawk.

Tripura-a non-banking financial company (NBFC) lian berte zinga mi, Rose Valley office hi March 4 khan CBI te'n an dap hnuah khar nghal a ni.