Arunchal-ah zirtirtu kutthlak vangin lungawi lohna lantir
Itanagar-a Dera Natung Government College zirlai pakhatin Mathematics Associate Professor kut a thlak avangin Arunachal Pradesh-a zirtirtu pawl hrang hrangte chuan nimin khan lungawi lohna an lantir.
Mathematics Associate Professor Dr K K Rai chuan exam-naa entawn a phalsak loh avangin first year zirlai, Ngurang Tati chuan Dr Rai hi kut a thlak niin an sawi.
State puma government college zirtirtu pawl hrang hrang chuan Associate Professor Dr Rai hi an thlawp thu an tarlang a, thuneitute'n pawikhawihtu lakah na taka action an la lo a nih chuan college exam neih mek boycott-ah an vau.
College zirtirtute hian nimin khan Arunachal Pradesh College Teachers Association (APCTA) kaihhruaina hnuaiah Dera Natung Government College-ah nawrh an huaihawt a, hun kalta pawh khan zirlaite'n an zirtirtute kutthlak an chin thu an tarlang.
April 9 khan Pasighat-ah JN College lecturer, Dr Punia Tao chu zirlai pakhatin kut a thlak tawh bawk a ni.
APCTA president Dr Jommi Loyi chuan zirtirtute hnena thil thleng ṭhin chu khamawm a tih thu sawiin, zirtirtute chu zirlaite hnek zirna (punching bag) an nih loh thu a sawi.
APCTA chuan thuneitute hnenah vawi tam tak zirtirtute himna ngaihtuahsak tura an ngen hnuah an hlawhchham thu an tarlang bawk a, state sorkar chu zirtirtute himna ngaihtuahsak thei loah an puh.
Zirtirtu pakhat chuan thilthleng chu vanduaithlak a tih thu sawiin, zirtirtuin a zirlaite hnen aṭanga a thil dawn let chu rapthlak a tih thu a sawi. Zirlaite chu nun kawng dik kawhhmuh a pawimawh thu a sawi rualin zirlaite hnena nungchang mawi zirtirna chu zirtirtute'n mawhphurhnaa la tura a duh thu a sawi bawk.
APCTA chuan zirtirtute chunga thil thleng ṭhin chungchangah khawtlang mipuite an inrawlh lo a nih chuan a tawp mai an rin loh thu an tarlang bawk. Nu leh pate chu an fate college admission hmuhsak ringawt a tawk loh thu thawnin, college kal tura in an chhuahsan aṭangin zirlaite chu nun kawng dik kawhhmuh ngai an ni, an ti.