CM Gogoi leh Railway Minister Prabhu-a'n meeting an nei

60th National Level Railway Week Award Function-2015 chhim tura Guwahati tlawhtu, Union Minister for Railway Suresh Prabhu chuan Thawhṭanni khan Assam Chief Minister Tarun Gogoi nen meeting an nei.

Meeting-ah hian Gogoi chuan Assam aṭanga rel kawng thui tak tak tlan ṭhinte tlanchak zawng tihsansak tur leh relte chu hmanraw changkang zawka thuam turin a ngen.

Railway Minister Prabhu chuan a ministry-in theihtawp chhuaha a lo bawhzui tur thu Gogoi a hrilh a, Lumding-Badarpur- Silchar inkara rel service leh rel station te tihchangtlun nan Assam sorkar chuan Indian Railway nena ṭangrualin Joint Venture Company a din theih thu a sawi bawk.

Chief Minister Gogoi chuan Guwahati leh Kamakhya rel station tihchang­tlunsak turin Railway Minister a ngen bawk a, Prabhu chuan a bawhzui tur thu leh Guwahati hmar lamah world class terminal din an tum thu a sawi bawk.

Assam Chief Minister chuan hmar­chhak mite'n North East Frontier Railways (NFR) hnuaia hnaruakte an chan ve theih nan NFR chu zone hrana dah turin a ngen bawk.

India ram Railway zone 17 zingah NFR hi hmarchhak bial tana ruahman ni mahse West Bengal hmar lam leh Bihar chhuah lam bial a huam tel a ni.

Meeting-ah hian Chief Secretary Jitesh Khosla, Additional Chief Secretary to Chief Minister, MGVK Bhanu Gogoi leh NFR General Manager Ranjit Singh Virdi te pawh an tel a, Chief Minister Gogoi chuan an thil phut hrang hrangte thlenin, memorandum a thehlut bawk.

Railway National Week Award hi Guwahati-a Indian Institute of Techno­logy (IIT) auditorium-ah Thawhṭanni khan neih a ni a, hei hi hmarchhak biala a hmasa ber a ni.