KU-in an thutlukna ennawn turin NSCN(K) ngen

Naga hnam pawl khat, Konyak Union chuan inkahhai thuthlung an chhunzawm tawh loh chungchangah SS Khaplang-a kaihhruai, Nationalist Socialist Council of Nagaland (NSCN-K) te chu an thutlukna ennawn turin an ngen.

KU president S Manlip Konyak leh General Secretary Y Hosea Konyak te chuan pawl thuchhuah an siamah Mon khuaah April 8 khan meeting an neih thu tarlangin NSCN (K)-in sorkar laipui nena inkahhai thuthlung neih a tum tawh loh chungchang an sawi ho thu an tarlang.

NSCN (K) leh sor­kar laipui chuan kum 14 chuang inkahhai thu­thlung an nei mek a, mahse thu­thlung hi kumin April 27 hian a tawp dawn a ni.

KU meeting chuan resolution pass-in NSCN (K) te chu Naga mipuite hmakhua ngaia inkahhai thuthlung ziak leh tura ngen thu an tarlang bawk.

Konyak Union chuan sorkar laipui leh NSCN (K) te chu an inhriatthiam lohnate chingfela, Naga mipuite beisei anga inkahhai thuthlung ziak thuai tura an duh thu an tarlang tel bawk.