AFSPA dodalnaah Manipur activist te'n Arunachal a thlawp

Sorkar laipuiin March 27-a thuchhuah a siamah Arunachal Pradesh district 12-a Armed Forces (Special Powers) Act lekkawha disturbed area a puan chu zirlai pawl leh political party te'n an dodal nasa hle.

All Arunachal Pradesh Student’s Union (AAPSU) chuan sorkar laipui thiltih dan chu domocracy kalphung tihhlumna a ni, a ti a, chhan mumal awm loin sorkar laipuiin AFSPA a lekkawh a ni, an ti. AAPSU chuan vawiin hian lungawi lohna lantira kawng zawh an tum thu an tarlang bawk.

North East Students Union (Neso) coordinator Pritam Bhai pawhin AAPSU te hmalakna chu a thlawp thu sawiin, kum 2007-a AFSPA chu an taka an tawrh tawh thu a sawi a, Itanagar khawpui bul lawk, Gumto-ah mi pakhat ran bo zawng chu sipai te'n an kapphlum a ni, a ti.

Sorkar laipuiin district 12-a AFSPA a lekkawhah Chief Minister Nabam Tuki pawhin a lungawi loh thu a lo tarlang tawh a, hemi chungchang hi Union Home Minister Rajnath Singh a sawipui tawh bawk.

Union Minister of State for Home Kiren Rijiju pawhin AFSPA chungchang chu ennawn turin Ministry of Home Affairs official te a hriattir tawh thu a sawi bawk.

Hetihlai hian AFSPA nasa taka dodaltu, Manipur-a activist te chuan AFSPA dodal kawngah Arunachal Pradesh an thlawp thu an tarlang.

Manipur-a Human Rights Alert executive director Babloo Loitongbam leh Neso secretary-general Sinam Prakash te chuan Arunachal Pradesh-a AFSPA dodalna leh April 19 aṭanga sawi hona hrang hrang neih turah tel an tum thu an tarlang.