Manipur : Internet service tih tawpna sut

Manipur sorkar chuan tualchhung boruak ṭhalo avanga Valley district pangaa internet leh mobile data service a tih tawp chu pawhsei a nih thu a sawi tuk, nimin September 16, 2024 khan dan pangngai anga tih nun a nih thu a puang.

State sorkar hian Pathianni khan district panga - Imphal East, Imphal West, Bishnupur, Thoubal leh Kakching district-a September 10 aṭanga internet service a tihtawp chu ni nga dang pawtseiin, September 20, tlai dar 3 thleng pawhsei a nih thu a puang a ni. Mahse nimin, Thawhṭanni khan heng district-a dan leh thupek dinhmunte thlirin, internet service chu tih nun an rel leh ta niin commissioner (home) N Ashok Kumar chuan a sawi.

Home Department-in nimina thuchhuah an siamah, 'State sorkar chuan buaina punlun zel tur venna atana state chhunga internet service a tihtawp chu, a sut leh ta a ni," tiin an tarlang.

Chief minister N Biren Singh pawhin a social media-ah internet service tihtawpna chu sut a nih thu a sawi a, mipuite chu fimkhur leh insum thei taka awm a, state chhung boruak tichhe thei lam hawi, inhuatna chawk chhuak thei thil post leh share lo turin a ngen.

Director of Education (S), L. Nandakumar Singh chuan state chhunga government school, government aided, private leh central school zawng zawngte chu vawiin, September 17 aṭangin class kal chhunzawm vek tawh turin a ti bawk.