Meghalaya: Cement company-te tualchhung mi ruai tam turin hrilh

Chairman Wailadmiki Shylla kaihhruai Meghalaya Assembly environmental team committee chuan East Jaintia Hills- a lung alh thei laihna hmun leh cement company chu hnathawktu an chhawrah tualchhung mi ruai tam turin a hrilh.

Committee hian heng hmunte hi an tlawh ṭuma an thil hmuh chhuahah, tualchhung mi hnathawka rawih an tlem hle a, helai hmuna hnathawk zingah hian pawn lam mi an tam zawk a ni. Shylla chuan tualchhung mi leh sa hnathawk tura rawih tam chu ngai pawimawh turin a chah a, heng company-ah hian tualchung(local) mi te hnathawk hmuh tam an duh thu a hrilh a ni.

Committee chuan hna an thawhna kawngah leilung leh a chhehvel humhalh tur te, corporate social actitivity(CSR) tih san leh ram leilung vawng him turin a chah a ni. Jirang MLA Sosthenes Sun chuan boruak tih thianghlimna hmanrua hman a rawt bawk.

MLA dang Sohtun chuan ram economy ṭhan lennan kan chenna leh a chhehvel humhalh ṭhat a pawimawh thu a sawi a, company te hnathawh chu an thlawp rualin, leilung tichhe lo turin a chah.

He inspection team hian Jaintia Coke Pvt Ltd, Dalmia Cement Bharat Ltd leh Star Cement te an tlawh a, cement company pasarihte presentation an endik bawk a ni. Meghalaya State Pollution Control Board hnenah Jaintia Hills-a coke plant awmte report kimchang thehlut turin an ti bawk a ni.