Tripura : Tuilianin zirna in 861 a ti chhia

Tripura state-a tun hnaia tuilian thleng chuan school leh zirna in 861 a ti chhia a, heng zirna in hrang hrang tan hian state sorkar chuan chhawmdawlna atan Rs vbc 12 a pe.

Education Department-a special secretary Ravel Hemendra Kumar chuan state sorkarin flood relief package atan School Education Department hnenah Rs vbc 12 hi a pe tih a sawi. Tuilianin zirna in a tih chhiat zingah hian lower primary school 194, higher primary school 274, senior secondary school 332 leh educational office 61 an tel tih a sawi. Zirna in chhia zawng zawng hlut zawng hi Rs vbc 262.08 hu nia chhut a ni a, tuilian vang hian zirlai pathumin nunna an chan bawk a ni.

Tuilian hian infrastructure te a tih chhiat bakah, lehkhabu 85,000, computer, laptop, mid-day meal supply, furniture leh hmanraw dang tam tak a chhe bawk. Tuilian avanga an zirlaibu chhia, zirlaite hnenah lehkhabu hi 21,552 sem a ni tawh bawk niin Kumar chuan a sawi.

Relief camp atan school hman a awm tawh lo a, school-te hi thenfai mek niin, tui lenna biala school 1,347 zingah 1,341 chu tihfai a ni tawh a, class te pawh dan pangngai anga kalpui niin, zirlaite pawh an kal ṭha tawh a ni.

Bakafa Public Library leh South Tripura District Public Library pawhin tuilian hi an tuar a, lehkhabu 8,000 vel a chhia. Hei bakah Belonia-a Ishwarchandra Vidyasagar College hungna bang, Mohapur-a Swami Vivekananda Mahavidyalaya-a kawng leh Hapania-a Women's Polytechnic College boundary wall leh kawng a chhe bawk.