Sikkim : Nathu La-ah car 1,000 park theihna hmun siamdawn

Sikkim sorkar chuan an state-a khualzinten an tlawh nasat, India-China border-a Nathu La-ah khualzin phur lirthei 1,000 vel dah theihna tur, parking lot lian tham siam a tum.

Chief minister Prem Singh Tamang chuan parking facility bakah, Gangtok khaw daia Ganesh Tok chu tichangtlunin, restaurants, banquet hall leh thil dangte siam belhin, tourist attraction-a siam an tum tih a sawi bawk.

Facebook post-ah Sikkim CM chuan he lirthei dahna, Nathu La-a siam turah hian lirthei 1,000 leng tura ruahman a nih thu a sawi. Ganesh Tok ah pawh hian khualzin mite hip thei tur Sikkim artwork leh hnam zia (culture) pholang thei thil dah an tum thu a sawi bawk.

State sorkar hian Namli ah convention center a sa dawn bawk a; guest house, conference room, auditorium, dining facility, sport complex leh inneihna hmun (wedding hall) te dah tel a ni ang. Gangtok mi hmeichhia hnathawk te tan khum 500 lenna hostel a sa dawn bawk a ni.

Sikkim sorkar chuan khualzin tam takin an state an tlawh rualin, an ram leilung leh a chhehvel vawnhim tumin hma a la zel a, an rama lirthei lut reng reng chu bawlhhlawh paihna garbage bag nei vek turin a chah.