BJP President-in Hmarchhak state-te tlawh dawn

BJP President Amit Shah chuan ni 12 chhung­in Hmarchhak state zawng zawng, Sikkim huamin tlawh a tum. Amit Shah hian vawiin April 16 ah Mizoram a tlawh hmasa ber ang a, hemi ni hian Public Meeting a nei ang. Aizawl-ah hian BJP president hian Bawng talh khap chungchang te, sakhaw zalenna(secularism) leh Governor ruat chungchanga sorkar laipui ngaihdan te a puang dawn a ni.

Zirtawpni ah ṭangrual sorkar an dinna hmun Nagaland a pan ang a, tichuan Inrinni ah Manipur a pan leh ang. Manipur aṭang hian New Delhi a pan ang a, karleh thawhlehni ah Sikkim khawpui Gangtok a thlawk lut leh dawn a ni

BJP President hian Nilaini ah Shillong a pan ang a, tichuan a tukah Itanagar a thlawk lut leh dawn a ni. Zirtawpni-ah Guwahati lam panin, heta ṭang hian Rajasthan a pan tawh dawn a ni. Rajasthan aṭang hian Pathianni ah Guwahati rawn thlawk lut lehin, Tripura a pan nghal ang.

Hmarchhak bial a fannaah hian BJP President hian centre-a BJP kaihhruai NDA sorkar­in hmarchhak bial tana a hmalak tumna hrang hrangte, hmasawnna tur program a siamte a sawi ang. Prime Minister Narendra Modi chuan hmarchhak bial chu a bika ngaihsak a nih tur thu a lo sawi tawh a ni. Amit Shah hi BJP President zinga hmarchhak state tlawh­chhuak hmasa ber tur a ni.

Hmarchhaka state pariat zingah Manipur, Mizoram, Assam, Arunachal Pradesh leh Meghalaya-ah Congress party in sor­karna a siam mek a, Tri­pura-ah CPI(M) sorkarin, Sikkim leh Nagaland-a regional party-te ro an rel bawk. Nagaland-a rorellai, Democratic Alliance of Nagaland (DAN) chu BJP nen an thawkdun a ni.

Mi maktaduai 45.58 chenna, hmarchhak bialah hian a mi cheng zinga 28% chu tribal an ni. Lok Sabha seat 25 awmin, kum 2014 inthlanpuiah khan BJP leh a thawhpui party-ten seat 10, Congress-in 8, CPI-M in seat 2 leh local party-ten seat 5 an la bawk.