Nagaland-a remna a awm theih nan Tamenglong-ah kawngzawh

United Naga Council (UNC) hmalakna hnuaia Committee on Peace in Longmai Area te chuan April 14 khan Naga ten remna an neih thuai theih nan Tamenglong-ah kawng an zawh.

Kawngzawhtu mipui kalkhawm te hian India sorkar chu Indo-Naga ten remna kawng an zawh thuai theih nan hma la turin an phut. Kawngzawh ah hian mi 15,000 vel an tel a, Noney Bazar Bridge Point aṭangin 8 Assam Rifles post thleng kawng an zawh a ni.

He kawngzawhah hian zirlai pawl hrang hrang te, school leh college zirlaite, tlawmngai pawl leh kohhran hruaitute an tel. 8thAssam Rifles post aṭang hian an kawngzawh ṭanna Noney Bazar Bridge Point thleng an zawh let a ni.

UNC president Gaidon Kamei chuan kum 60 chuang zet Naga buaina chu hmawrbawk a ni dawn ṭan a, hei vang hian Naga pawl hrang hrang te chu tharum thawha chet thawh lo turin a ngen.

Gaidon Kamei chuan "Insuihkhawm ila, Indo-Naga inremna tluantling hi nghak ang u. Naga buaina avang hian nunna tam tak kan chan tawh a,anmahni hi kan theih nghilh mai tur a ni lo. Naga tana pawm theih tur pawmtlak leh zahawm kan beisei tlat a,tunah rih chuan tharum thawhna kan dahṭha rih tur a ni" a ti.

Kawngzawhte hian memorundum an siam te chu Prime Minister Narendra Modi a hnenah an thawn a ni. Manipur Tamenglong district-a Longmai biala cheng mipuite hian, hruaitu chak tak hnuaia NDA sorkar hmalakna te chu an thlir reng a, Naga ten remna an neih theih nana NDA hmalakna chuan a tak ram a chan ngei an beisei thu an tarlang a ni.