Home minister-in ‘Destination North East-2020’ festival hawng
Union home minister Amit Shah chuan Pathianni khan ni li awh tur, 'Destination North East-2020' festival a hawng a, India ram hmarchhak bial chu a ram leilung mawina, culture leh art-te avangin India tourism-ah centre pawimawh tak a ni thei a ni, a ti.
Hmarchhak bial tourism tihchangtlunna atana buatsaih, 'Destination North East-2020' hmang chuan hmarchhak biala culture hrang hrangte leh tourist destination-te chu rampum huapin pho chhuah a ni dawn a, hemi hmang hian India ram mipuite pawhin hmarchhak bial ropuina leh culture-te an hriatchian phah thei dawn a ni, tiin minister chuan a sawi.
Shah chuan state danga tourist spot hrang hrang a tlawh kual tawh a, mahse hmarchhak bial mawina chu a dangdai bik hle tih sawiin, "Hmarchhak hi India lunghlu a ni a, a tel loin Indian culture hi a kim thei lo," a ti.
Event neih leh hunah a bial, Gandhinagar-ah buatsaih turin Amit Shah chuan a sawm nghal a, hemi hmang hian hmarchhak miten Gujarat culture-te an hriat theih phah bakah, Gujarat mipuite hnenah hmarchhak culture-te chu hrilh hriat an ni ve thei dawn a ni, a ti. Remna leh muanna chu hmarchhak bial tana economy, tourism leh employment lama hmasawnna turin a pawimawh hle tih a sawi bawk.
PM Narendra Modi kaihhruaina hnuaiah hmarchhak biala remna leh muanna a awm theihna turin theihtawp chhuah a nih thu Shah chuan a sawi a, Bangladesh nena land boundary agreement siam te, Manipur kawn danchah tihtawp te, Bodo agreement ziah te, sorkar kuta hel 641 inpekte chu hlawhtlinna eng emaw zat an hmuh tawh zingah a tel a ni, a ti. Modi hi prime minister a nih hnuah hmarchhak bialah hian ṭum 30 chuang a zin tawh thu sawiin, PM zingah hmarchhak tlawh ngun ber a ni tawh a ni, tiin a sawi.