Meghalaya : Sorkarin zirna dinhmun enfiahtu tur committee din

Meghalaya Education Department chuan state chhunga zirna lama harsatna tawh hrang hrangte a chhui chiang dawna, hemi atan hian fact-finding committee a din.

Committee hian zirna ina inziaklut tlem, zirtirtu aikal lak leh school building chhe chungchangte an zirchiang dawn a ni.

Education minister Rakkam A Sangma chuan Thawhṭanni, September 16, 2024 khan an hmalakna tur hi puangin, committee hian state chhunga school hrang hrang buaina tawk mekte chu zirchiang turin a tlawh dawn tih a sawi. School- a naupang zirlai inziaklut awm mang lo te, school chawlhsan pung nasa te, zirtirtu aikal la leh zirtirtu ten naupang an enkawlnaa thil felhlel awm te chhuichiang turin he commitee din hi a pawimawh hle a ni, a ti.

Sangma chuan zirlai naupang, school chhuahsan/chawlhsan an tam thu ah hian zirtirtuten mawhphurna sang tak an neih thu sawiin, an hna chu dah pawimawh a, zirna ṭha zawk pe chhuak thei turin a fuih.

India ram pum anga chhutin Meghalaya-ah hian zirna a tlahniam nasa hle a, hei hi zirtirtu te hnathawh danah a innghat thui hle tih Minister chuan a sawi bawk. SSA schoola naupang zirlai chawlhsan an tam lutuk chu a vei thu leh, zirtirtu zirna aia hlawh pung ngai pawimawh zawk te chu a duhloh thu a sawi bawk.

Minister chuan zirtirtu school kal ṭha peih lo leh zirna pe ṭha duhlo te chu banna thehlut mai turin a ti.

SSA zirtirtuten hlawh rei tak an lak theih loh thu chungchang pawh Sangma chuan sawi chhuakin, hei hi sorkar laipuiin a pek tur tihhniam a nih vang tih a sawi. State sorkar chuan he harsatna hi chinfel a, zirtirtute pawhin zangnadawmna ṭha tak an dawn theihna turin theihtawp a chhuah mek tih a sawi.