Arunachal : Ex-servicemen leh healthcare hnathawkte hamṭhatna tur pawm

Arunachal Pradesh chief minister Pema Khandu kaihhruaia Thawhṭanni, September 16-a state cabinet meeting-in thutlukna pawimawh tak tak a siam zingah, ex-servicemen leh healtcare hnathawkte hamṭhatna siamna tur pawh a tel.

Cabinet meeting-in a pawm zingah hian Group, A, B, C post a hna lak chungchanga tling pha te mark tihhniam bakah Common Examination Scheme (Group C) rules, 2023 pawh a tel a ni.

Ex-servicemen candidate-ten harsatna an tawh mekna, mark hmuh theih chin tlem ber thu ah hian cabinet hian APST candidate leh Persons with Benchmark Disabilities (PwBD) te chu intluk tlang turin a her rem a ni. He thutlukna hi sorkar chuan candidate te in tluktlanna tura ruahmanna a siam zulzuiin a siam a ni.

Arunachal Pradesh healthcare sector ṭhanlenna tura health and family welfare department rawtna thehluh chu cabinet chuan a ngaihtuah bawk. An rawtna siamte hi invenhimna, tihdamna leh rehabilitation care chak zawk hmanga healthcare service thuam chakna tur a ni.

Health and wellness officer, tutor, medical education director, leh family welfare director te lak dan tur chungchanga an thil phutte pawh cabinet hian a pawm. Hei bakah hian nursing superintendents lak dan turah chuan hna in a mamawh dan a zira ruahman tura tih a ni bawk.

Infiamna lamah a thiamte leh phu ngeite lak an nih theihna turin cabinet chuan a thlanna kawngah APSSB thawhpui a rel bawk a, hei hian langtlang leh dik taka hmalakna turah a pui dawn a ni.