Ruihhlo do leh sorkar rama awm chhuahtir kawngah tih bik awm lo : Manipur CM

Manipur chief minister N Biren Singh chuan ruihho leh a kaihhnawih do hna leh, sorkar rama awmte sawn chhuah kawngah sorkar chuan hnam leh pawl tihbik engmah a nei lo tih a sawi.

All Manipur Working Journalists Union din champha vawi 50 lawmna a hmanpuinaah, Chief Minister chuan state chhunga ruihhlo do hna kalpui mek leh, sorkar ram humhalha chengte sawn chhuah chuan pawl ṭhenkhat chu nghawng bik a nei ngei dawn tih a sawi. Hemi rual hian sorkarin a hmalaknaah hian tih bik a nei lo a ni, a ti.

Journalist a nih laite pawh a la hre reng tih sawiin, CM chuan Manipur-ah ruihhlo hmansualna a pung nasa em em a, HIV kai tamna ber state an lo nih tawh hial thu a sawi. Chief Minister anih hnua drugs do runpui (war on drugs) an kalpui chhan chu ṭhangtharte zingah ruihhlo leh a kaihhnawih a inhnamhnawih an pung zel leh, an tawrh nasat vang tih a sawi. He an hmalaknaah hian tih bik an neih loh thu sawiin, mihring nun chhan nana hma la an nih thu a sawi bawk.

Chief Minister hian kum ruk kalta chhung khan an state-ah Rs vbc 60,000 man hu ruihhlo man a nih thu a sawi a, hei bakah opium chinna hmun hectare 18,000 chu an lo ti chhe tawh bawk tih a sawi. An policy avanga tuar te hi lungawi lo viau mah se nakin zelah an state tana thil ṭha tur zawk a ni, a ti.