Assam-in tuilian tuar leh

Assam-a district pakuaa cheng mi nuai 2.25 dawnte chuan Pathianni khan tui lian an tuar nawn a, tui lian hian thlai chinna ram hectare 10,000 chuang a chim bawk niin state disaster management authority (ASDMA) chuan a tarlang. 

ASMDA report chuan tui lian tuarte hi Dhemaji, Lakhimpur, Morigaon, Nagaon, Majuli, West Karbi Anglong, Sivasagar, Dibrugarh leh Tinsukia district-te an nih thu sawiin, tun hnaiah ni eng emaw zat ruah  nasa taka a sur leh avangin kumin chhunga tuilian ṭum thumna hi a thleng leh tih a sawi. 

Kumin chhungin Assam-ah tuilian vang hian mi 118 in nunna an chan tawh. Kar liam ta Inrinni khan Nagaon district-ah mi pakhat a thi a ni. Tuilian hian district pakua-a khaw 219 a chim a, tuilian tuarte awmna tur hian relief camp 43 siam a ni bawk.