Manipur : Jiribam district-ah inkahna thleng leh

Manipur-a Jiribam district-a Meitei khua, Mongbung-ah helpawl nia rinhlelhten Thawhlehni zan dar 7 vel khan silai an hmetpuak leh niin nimin, September 18, 2024 khan police-ten an sawi.

Police-te chuan silai hi vawi eng emaw zat hmehpuah a nih thu sawiin, khawchhung volunteer-te pawhin an lo chhang let tih an sawi a, mahse inkahna thlengah hian hliam tuar an awm lo niin an tarlang.

Security force-te chu inkahna hmunah hian rang taka kal nghalin, zan dar 8 velah chuan buaina hi a reh thei niin an sawi. Thuneitute chuan thil awmdan chu ngun taka an thlithlai reng thu an sawi a, tualchhung mite pawh security force-te hma laknaah an thu ngaichang leh, thawhpui zel turin an chah.

Police officer chuan tualchhung mite hian tun hnaiah Mongbung khaw chungah drone thlawk an hmuh fo thu an hrilh niin a tarlang. Security force-ten Imphal East district-a Chanung leh C Zoulen khua an dapnaah, tualchher siam single barrel, SLR magazine pakhat leh live ammunition-te Thawhṭanni khan an man tih police thuchhuah chuan a tarlang bawk.

District 4-ah curfew thlahdul

Manipur sorkar chuan district pali - Imphal West, Imphal East, Bishnupur leh Thoubal a curew a puan chu nimin, September 18 aṭang khan zing dar 5 aṭanga zan dar 8 thleng a thlahdul.

Heng district pali boruakte chuan ṭhat lam a pan zel avangin he thutlukna hi siam a ni tih sorkar chuan a tarlang.

Curfew thlah dul ni mah se, hemi chhung hian punkhawm, sit-in protest leh rally te chu thuneitu lam aṭanga phalna lak hmasak loh chuan neih phal a ni lo thung. Curfew thlahdulin a huam loh chinah pawh, essential service lam erawh chu ngaihhnathiam chhunzawm an ni ang.

Helpawl nia hriatten drone hmanga Meitei khua an beih avanga Meitei zirlaiten lungawi lohna lantir a, buaina a chhuah zui hnuah September 10, chawhma dar 11 aṭang khan valley district-ahte hian buaina punlun zel tur venna atan sorkar chuan curfew a puang a ni. Internet leh mobile data service pawh tihtawp a ni a, mahse heihi sut a ni leh tawh a ni.