Arunachal: Assam Rifles kutah NSCN-K hruaitu inpe

National Socialist Council of Nagalim-Khaplang (NSCN-K) helpawl hruaitu, self-styled major Azen Wangsu chu Thawhlehni khan Tirap district, Arunachal Pradesh-a Assam Rifles kutah a inpe.

Kum 49 mi, Azen Wangsu hi Khonsa battalion, Assam Rifles kutah a ralthuam nen a inpe a ni. A inpek hnuah Assam Rifles chuan tihdan phung pangngai angin Khonsa police-te kutah en thlithlai zui turin an dah.

Wangsu hi Longding district-a Niausa khaw chhuak a ni a, kum 12 chhung NSCN-K member a lo ni tawh. Hmarchhak biala helpawl hlauhawm ber zinga mi hruaitu inpekna hian hmarchhak biala helna leh inlakhran duhna thleng ṭhin khuahkhirhna kawngah pawh awmze thui tak a neih theih beisei a ni. Remna leh muanna a awm theihna tura hmalakna kawnga hmasawnna pawimawh taka ngaih niin, Assam Rifles-te chuan helpawl ten nunphung pangngai an zawh leh theihna tura an beihna kawnga puitu pawimawh tak a ni bawk a ni.

Wangsu hi Khonsa police-te chuan NSCN-K hminga hma a lak tawh dan hrang hrangte an zawtfiah dawn a, kum 12 chhunga beihpui thlakna leh helpawl thiltihnaa a telna hrang hrangte zawh a ni ang.

Hetih lai hian Arunachal Pradesh Youth Congress (APYC) chuan Tirap, Changlang leh Longding district-te 'disturbed area' a puan a nih chu thil awmdan dik tak a ni lo tiin, pawn lam miten an bial an hmuh dan hian heng district-a chengte rilru a ti na hle a ni, a ti. An thlir leh hmuh dan dik lo tak hian mipuite rilruah hlauhthawnna a siam a, sorkar hnathawkte pawhin an biala awm duh loin, hei hian hma an sawnna tur kawng pawh a dal a ni, a ti. Sorkar official-te chu an bial mipuite tana theihtawp chhuah tur leh, danglamna leh hmasawnna thlentu ni turin a ngen a, ṭhalai hna hmu lo te tana hma lak sak turin a ngen bawk.