MGNREGS inhlawhna dawng lote'n BDO office an bei

Tripura, Unokoti leh Dhalai district-a MGNREGS inhlawhna sorkarin a pek theih loh vang­a lungawi lote chuan Nilai­ni khan hmun hnihah tharum thawhna an thlen a, Pacharthal rural development block-a lungawi lote chuan BDO chu thlan bikte hnenah chauh inhlawhna sum peah an puh a, a office an bei a ni. BDO office beitu, lungawi lote hi police te'n lo dangin an innawrnaah mi pasarihin hliam an tuar.

Unokoti District Magistrate M K Nath chuan civil mi pasarihin hliam an tawrh thu sawiin, Sub-Divisional Police Officer Prasenjit Ghosh, Pacharthal police station officer in-charge Saugata Chakma leh police pathumin hliam an tawrh thu a sawi bawk.

Nath chuan chuan Pachar­thal-ah hian venhimna khauh zawka kalpui nghal a nih thu leh security force te pawh dahbelh an nih thu a sawi bawk.

"Ministry of Rural Development chuan NREGS hnuaia inhlawhte tan sum pek dan a thlak danglam a, pawisa dawng turte account-ah direct-a dahsak tur an ni a, mahse hemi kawng­ah hian bank lamin harsatna an nei a, hei vang hian NREGS dawng tur te'n pawisa an dawn tlai phah a ni," tiin Unokoti District Magistrate chuan a sawi bawk.

Unokoti district-ah hian NREGS hnuaia inhlawhna sum cheng vaibelchhe 10 pek­chhuah tur a la awm a, heng zingah hian Pacharthal BDO office aṭanga pekchhuah tur cheng vaibelchhe 1.5 a tel a ni, a ti.

Hetihlai hian Dhalai Dis­trict Magistrate Milind Ram­teke chuan bank te harsatna vang­in Longtarai Valley leh Gandacherra sub-divisions-ah pawh NREGS inhlawhna pek tur chu tihkhawtlai a nih thu a sawi bawk.

Gandacherra-ah hian lung­awi lote chuan tualchhung bazar khar an tum a, mahse sumdawngte chuan hei hi lo dodalin, an inkarah buaina a chhuah phah bawk, tiin Ramteke chuan a sawi.

Kar kalta Inrinni khan Dhalai district, Chowmanu block-a NREGS inhlawhna sum dawng lote chuan BDO leh official pathum kut an thlak tawh bawk.

CPI(M) thupuangtu Goutam Das chuan eptu party, Congress leh Indigenous Peoples Front of Tripura (IPFT) te chu mipuite fuihpawrh leh buaina chhuah chhanah a puh.

Congress President Birajit Sinha chuan thuneitute chu NREGS inhlawhna pek­chhuah kawngah duhsak bik neihah a puhlet thung a, sorkar rorel dan fel lo chu buaina chhuah chhan a ni, a ti.