MHA-in thudelhkilh neiin AFSPA hlih a huam

Sorkar laipuiin Armed Forces (Special Powers) Act (AFSPA) tlawhchhana Arunachal Pradesh district 12 'disturbed area'-a a puan chu state mipuite'n nasa taka an dodal hnuah Ministry of Home Affairs (MHA) chuan state sorkarin helpawlte beihlet a tum dan kimchang a hriattir a nih chuan disturbed area a puanna chu ennawn a huam thu a sawi.

MHA chuan Aruna­chal Pradesh sorkar lehkha a thawnah AFSPA tlawhchhana district 12 disturbed area-a a puan chhan chu helpawlte beih­let kawnga state sorkar a ṭanpuina a ni, a ti a, state sorkarin a ral rel dan kimchang MHA a hriattir a nih chuan AFSPA chu hlih a huam thu a tarlang tel bawk.

Arunachal Pradesh-a Assam ramri district 12 te chu MHA chuan March 27 khan thuchhuah siam­in, disturbed area-ah a puang a ni.

MHA chuan thu­chhuah a siamah Tirap, Changlang leh Longding district bakah district dangte chu NDFB, NSCN, ULFA leh helpawl dangte'n chetlak nan an hman avangin heng biala dan leh thupek dinhmun siamṭhat chu a thil ngaihpawimawh a ni tih a tarlang a, helte beih­let nan disturbed area-a puan chu thil ṭul a ni, a ti.

State sorkar rawn loa sorkar laipuiin Arunachal district 12 disturbed area-a puan chungchangah Chief Minister Nabam Tuki chuan kar kalta khan sorkar laipui chu sawiselin, state thuneihna beihna a ni, a ti.