LBA kalpuina turah Assam teltir dawn lo

Sorkar laipui chuan Bangladesh nena Land Boundary Agreement (LBA) a ziah a taka tihpuitlin nan constitution amend a tum a, Parliament session neih leh turah amendment bill hi a putluh rin a ni.

Official chuan LBA kalpuina atana draft bill siam mekah Assam chu sorkar laipuia thuneitute thurawn angin telh a ni loh thu a sawi.

LBA kalpuina tur hi Assam chuan a ram bung ṭhenkhat Bangladesh laka a hloh theih dawn avangin a dodal nasa hle.

Assam hian a ram acre 268 chu Bangladesh lakah a hloh dawn a, hei hi sorkar laipuiin Assam leh Bangladesh ram inchuh thubuai chinfelna atana a ruahman a ni.

Assam hian nakkumah assembly inthlan a hmachhawn dawn a, hei vang hian central-a BJP sorkar chuan LBA-ah hian Assam a teltir ngam lo niin an sawi.

Indo-Bangladesh Land Boundary Agreement revised plan chuan India ram lamah West Bengal, Tripura leh Meghalaya ramte a huam ang.

Sorkar laipui chuan LBA-a Assam teltir a tum loh thu hi Bangladesh sorkarah a thlen thuai rin a ni a, hei hi Bangladesh-in a pawm leh pawm loh tur thu hriat a ni lo.

LBA tihpuitlinna atan hian Parliament-ah constitutional amendment bill pass phawt a ngai a ni.

India leh Bangladesh chuan LBA hi kum 1974 khan an ziak tawh a, kum 2011, September thlaa Manmohan Singh-a'n Prime Minister a nih laia Dhaka a tlawh ṭumin LBA hnuaiah hian thuthlung dang ziah belh leh a ni.