AP-in AFSPA ennawn turin sorkar laipui ngen a tum

Armed Forces Special Powers' Act (AFSPA) thlawhchhana Assam ramri biala district 12 disturbed area-a puan chu ennawn turin Arunachal Pradesh chuan sorkar laipui ngen a tum.

Chief Minister Nabam Tuki kaihhruaia cabinet meeting April 14-a neihah he thu­tlukna hi siam a ni tih Arunachal Pradesh Home Minister Tanga Byaling chuan a sawi.

Home Minister Byaling chuan Arunachal chu hmarchhak state zingah state ralmuang tak a nih thu sawiin, ṭualto helpawl an neih loh thu leh district 12-ah AFSPA tlawhchhana disturbed area puan a ni chu hriatthiam har an tih thu a sawi.

State cabinet meeting chuan sorkar laipuiin a hmaa Tirap, Changlang leh Longding district, disturbed area a lo puan tawh te bakah Assam ramri hrula kilometre 20 bial chhunga disturbed area a lo puan tawhte chu a ngai anga kalpui ṭha an tih thu sawiin, ramri district 12 disturbed area-a puan vek chu ṭha an tih loh thu an tarlang bawk.

Union Minister of State for Home Affairs Kiren Rijiju-a'n AFSPA lekkawh chungchang leh helte'n tun hnaia Army convoy an lambun chungchanga Home Minister Byaling nen kan inbia tia a sawi chu Byaling chuan thudik a nih loh thu sawiin, sipai pali thihna thlentu, Tirap district, Khonsa-a Army convoy lambumna chungchangah state home department te hnenah intelligence information pek an nih loh thu a sawi.

Byaling chuan Arunachal district hrang hranga helpawl an awm nia Union Home Ministry-in a sawi chungchangah state security agency te leh district thuneitute hnen aṭangin report a dil thu sawiin, hel an awm ngei a ni tih finfiahna an pek theih loh thu a sawi bawk.

Ram venhimna chungchangah State sorkar chuan sorkar laipui a thlawp thu sawiin Byaling chuan a sawi bawk.

Hetihlai hian disturbed area-a district 12 puan a nih avanga lungawi lote chuan Nilaini khan Itanagar-ah kawng an zawh.

Kawngzawh hi All Arunachal Pra­desh Students’ Union (AAPSU) kaih­hruaina hnuaiah neih a ni a, Rajiv Gandhi University, North Eastern Regional Institute of Science and Technology leh college hrang hranga zirlaite an tel a, state chhunga tlawmngai hrang hrangte'n an thlawp thu an tarlang bawk.

AAPSU chuan AFSPA leh Arunachal Pradesh Unlawful Activities (Prevention) Act (APUAA) lekkawh a ni chu an lungawi loh thu tarlangin, Governor hnenah AFSPA leh APUAA hlip tura ngenna, memoramdum an thehlut.

Arunachal zirlai pawlte hian AFSPA kaihhnawiha tharum thawhna thleng leh pawikhawihna tuartute chhawmdawlna chungchang zirchiang turin fact finding committee din a phut bawk.

Kum 2007 khan Tana Paul chu Gumto hmunah sorkar sipaite'n an kahhlum tawh thu tarlangin sipaite kut tuara thi chhungte hnenah rorelna dik hlenchhuah a nih ngai loh thu a tarlang bawk a, sorkar laipui chuan AFSPA lekkawhin mipuite inkarah inhuatna a chawk tho mai a ni, an ti.

AAPSU chuan Arunachal sorkarin kum 2014-a a pass, APUAA chu mipuite nek­chepna dan mai a ni, a ti a, India danpui bakah Indian Penal Code (IPC) leh Code of Criminal Procedure (CrPC) palzutna a ni, a ti.

AAPSU general secretary Biru Nasi chuan APUAA chu mipuite dikna chanvo nekchepna a ni, tiin, APUAA hnuaia pawikhawihtua rinhlelh judiciary hriatpuina loa, police te'n ni nga chhung an kawl theihna dan chu hlih a nih loh chuan hun lo kal zel turah mi tam takin an tawrh­phah an hlauhthawn thu a sawi bawk.

Arunachal district 12 disturbed area-a puan a nih chungchangah Arunachal tualṭo party, Peoples’ Party of Arunachal (PPA) pawhin Ningani khan nawrh a huaihawt bawk.

PPA president Khafa Bengia chuan, "AFSPA chu 'dan sakei' a ni a, lekkawh a nih chuan mipuite zingah hlauhna leh rinhlelhna tam tak a siam dawn a, mipui­te leh security force te inkara boruak ṭha lo thlen theitu a ni bawk a ni," a ti.