Dimapur-ah Police Commissionerate hawng

Hmarchhak khawpuia a pahnihna atan Dimapur Police Commissionerate chu Nilaini khan hawn a ni. Guwahati khawpui chuan police commissionerate hi a hmain a lo nei tawh bawk.

Dimapur Commissioner of Police atan Liremo Lotha, IPS chu lakluh nghal a ni.

Commissionerate hawnna inkhawma khuallian, Chief Minister TR Zeliang chuan thuchah sawiin, Police Commissionerate hawn a ni ta chuan Dimapur-a dan leh thupek lekkawh kawngah hmasawnna tam tak a thlen ngei a beisei thu a sawi.

Remna leh muanna a awm theih nan police kal­phung leh an inrelbawlna tihchak a pawimawh thu a sawi a, hei vang hian state sorkar chuan Dimapur-a dan rorelna tihchak nan police commissionerate hawn a rel a ni, a ti.

"Dimapur zau zawng hi Nagaland ram zau zawng aṭangin 10% hnuai lam a ni a, mahse Nagaland-a pawikhawihna thubuai 43% thlenna hmun a ni. Hmalam panin Nagaland a kal zel dawn a nih chuan Dimapur-a sorkar rorelna kalphung tihchak a ṭul a ni," tiin Zeliang chuan a sawi.

Nagaland Chief Minister chuan pawikhawihna tihtlem nan police, intelligence department, khawtlang hruaitute leh tlawmngai pawlte'n thawh hona ṭha an neih a pawimawh thu a sawi bawk.

Kum khata Police department senso tarlangin state budget-a sum ruahman vaibelchhe 5,000 aṭangin vaibelchhe 1,000 vel a nih ṭhin thu Zeliang chuan a sawi a, hei hi kum khat chhung­a state sorkar senso zawng zawng aṭangin 30% a tlin phak thu a sawi bawk.

Official record awm lo mah se state-a mihring awm zawng zawng aṭanga police personnel awm zat tehna, police-population ratio-ah Nagaland chu a sang ber a ni, a ti. Nagaland ratio hi 1:7 a ni a, police pakhatin mi pasarih a vil ang a ni.

State Home Minister Y Patton pawhin commissionerate hawn a ni chu Dimapur police te tan thu lawmawm a nih thu sawiin, Nagaland mipuite'n Dimapur khawpui ralmuang tak an beisei theih a rin thu a sawi.