NEEPCO hydel project an dodal
North Eastern Electric Power Corporation (NEEPCO)-in Assam-Meghalaya ramria 240 MW hydel power project a kalpui tur chu chhungkaw 1,000 chuangin a nghawng an tawrh dawn avangin mipuiin an dodal nasa hle.
Lamalong bul, Umiam luia power project kalpui tur atan hian Assam leh Meghalaya sorkar te chuan NEEPCO hnenah no objection certificate (NOC) an pe tawh a ni. Powert project atana tuikhuah hi metre 100-a sang tura ruahman a ni.
Umiam lui bula cheng, tualchhung mite chuan tuikhuah hian sq km 600 bial chu tuiin a chim dawn niin an sawi a, thingtlang khaw 20-a chhungkaw 1,000 chuangin hei hi an tuar dawn a ni, an ti. Heng thingtlang khuate hi an pem chhuah a ngaih dawn bakah ramngaw, nungcha leh huan thlaiin an tawrhphah dawn bawk a ni.
State pahnih ramria mipui 5,000 chuang chuan Assam, Karbi Anglong district-a power project dodalna kawngzawhah kar kaltaa an huaihawtah state pahnih sorkar chu NEEPCO nena an thuthlung hnukkir turin an phut.
Chief Minister Mukul Sangma leh Assam Chief Minister Tarun Gogoi te chu power project kaltlangpui lo turin activist te'n an lo ngen tawh bawk.
Meghalaya MLA Julius K Dorphang leh Assam MLA Mansingh Rongpi te chuan power project dodalna hi an thlawp a ni.
MLA Dorphang chuan thingtlang mite pawhin an chenna leh an nunna atana hlauhawm phah chuang si loin hmasawnna chu an duh a ni, a ti.
MLA Rongpi pawhin project atana tui khuah a nih chuan Umiam luia innghat, tribal hnam ṭhenkhat- Khasis, Lalungs leh Mikirs mite damkhawchhuah nan a harsa dawn a ni, a ti.