Khandu-a'n hmachhawp puang

Arunachal Pradesh Chief Minister thar Pema Khandu chuan a hmachhawp hrang hrang te a puangchhuak a, a kaihhruai sorkar chuan eirukna do turin theih tawp a chhuah dawn a ni a ti a, chumi tur chuan hma a lak nghal tur thu a sawi.

Pathiannia chief minister atana lakluh a nih hnu khan Chief Secretary Shakuntala Gamlin leh sorkar mipawimawh te nen meeting an nei nghal a ni. Khandu chuan hmasawnna tak tak kalpui turin infrastructure changtlung leh inkalpawhna ṭha a pawimawh a ni a ti. Leilung hausakna te haichhuah a, information technology lama ke pen te, zirna ngaihpawimawh te chu hmasawn nana thil ṭangkai a ni a, a bikin hmarchhak state te tan chuan tourism chu hmasawnna thlen theitu te zinga a mi a nih thu sawiin, hydropower tam zawk thar chhuak thei tura theih tawp chhuah chu thil tih makmawh a nih thu Pema Khandu chuan a sawi.

Arunachal Pradesh CM hlui Kalikho Pul chuan an state chuan chief minister thar kum 37 mi Pema Khandu chu duhsakna hlanin, state hmasawn nana theih tawp chhuah turin a duh tih a sawi. Pul chuan Khandu leh a Deputy Chief Minister Chowna Mein te hian hna ṭha takin an thawk ngei ang tih a rin thu sawiin, anmahniah mipuite pawhin beiseina sang tak an nei dawn a ni, a ti.